Kompeni Mishcon de Reya ti bepalan di London ti ngarika Taib Mahmud enggau menantu iya Sean Murray sereta mega enggau kompeni-kompeni sida baka Sakto, Sakti enggau Ridgeford Properties, udah ditangkan enggau jaku awakka “badu ngelindung bala orang ti udu korup” lalu ninggalka pelanggan sida ti udu bekontroversi nya.
Dalam sebengkah penerang ti dikeluarka sehari tu, dia NGO Bruno Manser Fund (BMF) bisi ngayanka:
“Kaul kompeni lawyer Mishcon de Reya enggau sida Taib Mahmud sebilik nya udah betumbuh dalam taun 2011, lebuh kompeni lawyer nya madahka diri deka ngatur tindak undang-undang ngagai bala pengarang berita British ti udah chakah nuliska repot pasal Taib Mahmud sebilik enggau kaul sida ba reta enggau pengeraja sida bejuta-juta dollar ti disimpan di menua tasik.”
NGO BMF ti bepalan di menua Switzerland nya minta kaul kompeni lawyer nya enggau sida Taib Mahmud sebilik diputuska sekali.
Penerang ti udu salah ti nanahka Taib Mahmud
“Ba minggu nyin kemari, suratberita The Independent, bisi ngulihka jaku penerang ari kompeni lawyer Mishcon de Reya nya ti nyebut “perintah menua Sarawak semina ngeluarka lisin-lisin ke tanah-tanah ti diambi ngena chara ti beatur-atur … Tu nyadika sebengkah atur pengawa, lalu ukai dikuasa atur politik. Bala pelanggan kami enda kala minta sebarang bagi tauka minta suap ba pengawa meri lisin-lisin enggau surat pajak tanah nya.”
Beduduk ba penerang nya BMF udah enchabar kompeni Mishcon de Reya nerangka enggau silik nama kebuah, ba “chara ti beatur-atur” nya, nyau ka 200,000 hektar tanah kampung bungas di menua Sarawak udah diempu kompeni-kompeni kebun dandang besai sawit ti endur bala sida Taib Mahmud sebilik bisi kaul ti tegap ba pengawa dagang”. [sebengkah penerang dalam Stop Timber Corruption, 28/3]
Pekara nya udah enggau jampat dikeluarka dalam laman Wikipedia, ti nyadi orang ketiga ngaga pemutus runding sida mantu bejalaika kimpin ngemanahka nama Taib Mahmud ti disadang dibayar sida Taib Mahmud sebilik ba pengawa sida ngelaban bala orang ti mantah sida.
Penerang-penerang ti bukai ti mega ditemu ngerichauka runding ti dipansutka Mishcon de Reya ngarika pelanggan sida nya, madahka Taib Mahmud endang nadai mangku sebarang pengawa nyadi pengarah tauka megai sebarang share dalam kompeni-kompeni Sakti, Sakto tauka Ridgeford Properties.
Dawa tu dipansutka sida dalam taun 2011 udah bekau Sarawak Report mantaika dokumen-dokumen rasmi ti nerangka enggau silik madahka Taib Mahmud nya bisi mangku pengawa nyadi pengarah dalam kompeni Sakti baka ti dichelak dalam dokumen ti disimpan di menua California nya. Kami mega kala ngayanka sebengkah surat sempekat resia ti disimpan ti bisi madahka 50% ari semua share dia dipegai sechara resia ke Taib Mahmud, taja pan ba luar, dituliska nama bala sida sebilik.
Umbas nya ngemba bala pengarang berita
BMF mega enchabar Mishcon de Reya awakka sida badu ngemba bala pengarang berita ti benung chakah ngenataika berita ti bendar pasal pengawa dagang Taib Mahmud sebilik ngagai mensia mayuh. NGO nya udah madahka jaku emba ti ditujuka ngagai sida nya enda beradat taja pan sida diupah pelanggan ti kaya, tangt kamah. Pengawa ngemba bala pengarang berita baka nya deka ngamahka nama kompeni lawyer nya empu enti sema jaku emba nya ditemu puang:
“Ba bulan April 2011 suba, pengarang berita Clare Rewcastle Brown bisi nerima sepuchuk surat tangkan ari kompeni lawyer Mishcon de Reya. Surat nya ditulis ngarika menantu Taib Mahmud, Sean Murray, ti serebana pasal asil tulis pengarang berita nya ti ngenang pasal kompeni-kompeni sida Taib Mahmud sebilik baka Sakti International Inc. (US), Sakto Corporation (Canada) enggau Ridgeford Properties (UK).
“Clare Rewcastle Brown nya siku pengarang berita ke laman blog Sarawak Report, udah diberi sida timpuh 7 hari endur matak semua jaku tuduh ari blog iya, lalu enti iya enda nitihka tangkan nya, bala lawyer dalam Mishcon de Reya deka “ngirit iya ngagai kot”. Bala lawyer nya madahka “pelanggan kami tu bisi kuasa nawa nuan ketegal semua jaku tuduh ti udah ditulis nuan pasal iya.” Tang lebuh Clare Rewcastle Brown enda madamka jaku tuduh iya ari laman blog nya, jaku emba ari Mishcon de Reya nya lalu nyadi emba ti bari”.
NGO nya diatu benung chakah mantaika kaul beberapa iku “penulung ari menua tasik” ti mantu iya ngeruga rampa menua di Sarawak, lalu pengawa sida nya endang dipampas iya enggau upah ti besai.
Kompeni Mishcon de Reya nya nyadika sebagi ari raban penulung ari menua ti ditemu mantu iya sama-sama enggau bala akauntan, bala pakar bank, bala orang PR enggau bala pakar teknikal baka Torstein Sjotveit, ti ditekanka NGO mantu Taib Mahmud nabanka pengeraja menua.
Enggau penerang-penerang ti majak betambah pasal siku tuai menua ti udu korup ari Sarawak nya, ti diatu udah manggai 33 taun iya megai perintah nyadi Kepala Menteri, dia bala “penulung ari menua tasik” ke Taib Mahmud nya meda penuduk sida nyau enda ngasuh orang bukai kepapas.
Bacha repot ti penuh ditu – http://www.stop-timber-corruption.org/campaign_update?show=61