Ba ujung minggu tu raban orang ti rinduka rampa menua sereta bebasaka kuasa pengelantang mensia di Sarawak enggau Malaysia udah sama sereta ngepunka sebengkah kempen meri pemereti ati ngagai dunya ngagai penanggul pengangat dunya.
Sida numpuka pengirau ati sida ngagai langgur “gila” Taib ti ngepunka projek-projek tekat besai di Sarawak.

Dalam sebengkah jaku penerang ti disukung mayuh bengkah raban NGO Malaysia, sida udah ngutuk sereta mantah polisi ngaga 50 iti tekat ke Taib ti udah tinggal arus dunya rebak baru ke menua Sarawak, ti kenu ku iya deka ngaga Sarawak nyadi sebengkah “palan pengawa beindustri”.

Bala NGO nya nujuka tagit sida ngaga jaku tuduh Taib ti ngasuh ati geli ti madahka menua iya agi ngembuan mayuh kampung bungas ‘ti manah ke rampa menua’ lalu nitihka raban-raban NGO tu, tekat ai nya ukai semina ngerusak rampa menua tang mega deka mai penanggul ba pengangat dunya.

Kebuah baka nya laban ai dalam tekat nya betakat enggau mayuh, (lebih agi ba menua tropika ti angat) deka ngeluarka beribu-ribu tan gas methanol ngagai angin.

Dalam pengawa iya ti nyadi kepala raban apek bayat makai suap ba pengawa ngulihka kayu batang; tuai ba pengawa ngerampas tanah endur muka kebun sawit lalu diatu ti nyadi arkitek 50 iti projek tekat besai-besai di Sarawak, kami deka meri gela ngagai Abdul Taib Mahmud nya penuduk Pengabis Tinggi Orang Ti Ngerusak Rampa Menua ke Serata Dunya ba ikas entarabansa diatu.

Penerang Hari Ngambi Tindak Serata Dunya ari Raban NGO Malaysia ke sehari tu:

“Semua peranak menua Malaysia bela ngambi bagi sida ba pengawa ngambi tindak ba atur mutarka penanggul ti pelesu dikena (perintah)napi krisis gaya hari – Ketuka polisi gila ngaga tekat ti besai-besai di menua Sarawak.
“Tekat ti besai-besai di menua Sarawak nya mai pengerusak ngagai sistem gaya hari, penanggul ngagai rampa menua lalu ngelanggar atur pengelantang raban bansa asal.

Ubah ba gaya hari nya nyadika krisis mensia pemadu balat ba ikas entarabansa

Ba repot ti pengabis baru ari seraban Panel Entara Perintah bekaul enggau Ubah Ba Gaya Hari (IPCC) udah ngaga simpul penemu sida ti madahka “pengangat ba sistem gaya hari nya bisi bebida-bida” lalu “nagang ubah ba gaya hari nya deka begunaka atur pengawa ngurangka pengeluar gas rumah gadung ti meruan”.

Kami deka netapka menua Malaysia, ti nyadika sebuah menua ti benung mansang, udah ngambi bagi ti mit ba atur ngurangka penanggul tu enti dibandingka enggau menua-menua beindustri ti bukai, kami patut bekereja dalam gerempung dikena nagang ubah gaya hari. Kami mega deka nentuka atur ti bisi dituduhka.
Dalam atur nyikap diri sebedau ngulu aum ba Gerempung Bansa ba bulan Sebelas di menua Warsaw tu ila, Kempen serata dunya dikena Ngulihka Pengelurus Gaya Hari ngansak ngambika semua mensia di serata dunya tu angkat sama-sama ngutuk projek kuasa elektrik ti mai pengamah lalu minta sistem pengeluar kuasa nya diubah.

Tekat ti besai-besai nya enda besenutuk enggau gaya hari lalu mega enda manah ke mensia

“Tang menua Sarawak di Malaysia ditemu salah laban ngelakuka sebengkah atur ti pelesu dikena mutarka penanggul – ngaga tekat besai-besai – ti deka mai pengerugi ukai semina ngagai ubah ba gaya hari enggau rampa menua tang mega tau mejal raban bansa asal dipindahka ninggalka menua asal sida empu.

Kami, ari menua Malaysia enggau mega ari Sabah ti nurunka tanda jari kami ditu bisi bendar pengirau ati, enggau chara nyukung kempen GCDCJ ti nagaka sehari tu (12hb Sepuluh) nyadika hari dikena ngambi tindak dikena mantah ngelaban projek tekat ti besai-besai sereta tau nganu nyawa mensia.

Kami segempung ati enggau bala menyadi kami di Sarawak, Malaysia, kami mantah polisi perintah Sarawak ti seruran begigaka pengulih kuasa hidro ari sungai di menua nya lalu mengkang madahka atur nya atur ti meruan.

Perintah menua Sarawak udah netap pemendar ti madahka pengawa ngaga tekat ti besai-besai nya dikena nyukung projek SCORE ti, kenu ku sida, ngemanahka penyeranta rakyat sida.

Pemanah enggau penguntung ti datai ari tekat ti besai-besai nya udah ditemu pelesu lalu asil pansik udah nunjukka pengeluar gas methanol ti datai ari uras organik ti majak buruk ketegal ai tekat ti betakat endang deka nambahka penanggul pengangat dunya. Gas methanol nya nambahka empas pengeluar gas rumah gadung ti 20 kali lipat ngujungka pengangat dunya enti dibandingka enggau pengeluar gas karbon dioksida ngagai angin. Rampa kampung ti besai, ti nyadika endur nyimpan karbon enggau nginsap karbon, mega dibasau ngapa lebuh diampuhka ai tekat.

Projek SCORE ti meri malu

Besiping bendar ngagai raban bansa asal nya ti dipejal mindah ninggalka menua asal sida ketegal ti deka ngawakka pengawa ngaga projek dikena ngeluarka kuasa elektrik ti nerumpak kampung enggau tanah pesaka sida, pengidup sida enggau identiti gaya idup sida, tang sida mengkang enda diberi perengka ke guna sida idup besehari-sehari baka bekal kuasa elektrik.

Nambah ke nya mega, projek tekat nya dipeda ngeleseka orang bansa asal lebuh SCORE ulih bejaku besai madahka sida ulih narit orang dagang ngena bayar kuasa elektrik ti murah ti datai ari tekat ai ti besai-besai.
Ari tekat Bakun ti udu dibantah nyentuk ke Tekat Murum ti nyau deka tembu, lalu ngagai Tekat Baram ti tetap deka dipajakka taja pan nerima bantah ari orang bansa asal, perintah menua Sarawak mengkang nunjukka sida majakka model pemansang ti deka mai pengerusak ba ubah gaya hari kelimpah ari ti enda ibuh ke kuasa orang bansa asal.

Peminta-peminta kami

Kami ngansak perintah Sarawak enggau perintah Besai ngambika ngamatka peminta raban bansa asal ti begunaka kuasa elektrik enggau chara ngiga penatai kuasa ti asal enggau kuasa ti meruan baka bejalaika projek mekalka kuasa elektrik ari luar grid, ngati ke diri lalu ulih digaga baru.

Kami balat ngutuk pengawa ti ngubah sungai nyadi pun penatai kuasa elektrik ti murah lalu nyual kuasa nya ngagai pengawa industri ti mai pengamah ke rampa menua baka palan pengelebur aluminum enggau mangan dalam projek SCORE.

Enggau tu, kami ngansak penyukung projek tekat, iya nya Sarawak Energy Berhad, Perintah Sarawak enggau Perintah Besai patut ngetuka projek ti enda meruan belama-lama nya enggau tekala nya lalu badu agi ngelanggar kuasa pengelantang orang bansa asal.”

Penerang di atas nya udah ditanggam gerempung enggau orang siku-siku:

1. Anak Muda Sarawak
2. Baramkini
3. Centre for Independent Journalism Malaysia (CIJ)
4. Centre for Orang Asli Concerns (COAC)
5. Centre for Environment, Technology and Development Malaysia (CETDEM)
6. Community Action Network
7. Community Development Centre (CDC)
8. Consumer Association of Penang (CAP)
9. Damn the Dam Action Group
10. EcoKnights
11. Himpunan Hijau
12. HUTAN (Sabah)
13. Islamic Renaissance Front (IRF)
14. Jaringan Orang Asal SeMalaysia (JOAS)
15. Jaringan Rakyat Tertindas (JERIT)
16. LLG Cultural Development Centre
17. Malaysians for Beng Hock
18. Monitoring of Sustainability of Globalisation (MSN)
19. Parti Sosialis Malaysia (PSM)
20. Partners of Community Organisations (PACOS, Sabah)
21. Peoples’ Green Coalition
22. Persatuan Kesedaran Komuniti Selangor (EMPOWER)
23. Persatuan Murid-murid Tua Sekolah Kuen Cheng, Kuala Lumpur
24. Pertubuhan Pemuda GEMA Malaysia
25. Pusat KOMAS
26. Sabah Environment Protection Association (SEPA)
27. Sahabat Alam Malaysia (SAM)
28. Saya Anak Bangsa Malaysia (SABM)
29. SOS Selangor
30. Stop Lynas Coalition (SLC)
31. SUARAM
32. Tamil Foundation
33. Third World Network (TWN)
34. Tindak Malaysia