Taib Mahmud bisi didinga besebana madahka menua Sarawak diatu benung diperatika raban pengarang berita udah bekau menua nya lama udah dalam ‘pengabur’.
Tang, enggau pengabur nya lalu enda direpotka dalam sebarang media ti dikuasa iya, pengasar bala apek bayat udah ditejuka nyadi-senyadi dikena ngeruga tauka beduan bala orang bansa asal di menua iya empu nya.
Dalam pengelama beberapa taun raban apek bayat udah dikena beduan raban bansa, ngambika dikena nyukung lisin nebang kayu batang enggau pengawa muka kebun sawit ti diberi Kepala Menteri nya.
Lalu, ke bendar iya, semina mimit aja bala orang di serata dunya tu ti nemu pasal utai ti dikereja Taib Mahmud ba menua iya empu nya.
Enggau nya, kami nuduhka penemu kami awakka perati bala pengarang berita diatu patut ditujuka ngagai sekeda kandang menua ti dikeruga pengasar apek bayat, baka di Melikin di pelilih Serian, Sarawak, ti endur ngelama tu orang bansa asal menua nya udah napi keruga enggau dikeduan bala apek bayat.
Agi mega, kepala Menteri nya deka ke semina “berita ti amat” aja patut ditusui dalam media ti dikuasa iya.
Diatu udah datai ba maya iya opis Suruhanjaya Pencegahan Rasuah Malaysia (SPRM) patut mansik kaul entara raban apek bayat enggau kompeni-kompeni ti ngupah bala apek bayat nya enggau bala orang politik di menua nya, ti bisi kaul ba pengawa ngerampas tanah – iya nya bala bakih politik Taib Mahmud empu.
Beduduk ari nya dia raban polis udah ngena maya ti lama mansik pengawa bala apek bayat tu, semina ketegal bala orang ti bempu lisin nebang kampung enggau muka kebun sawit ti bisi kaul politik ba ikas ti tinggi.
Kelimpah ari nya, raban polis rindu agi nangkap lalu nawa bala orang bansa asal ti kena keduan nya, belalauka repot tuduh penyalah ti pelesu ari kompeni-kompeni kayu batang enggau kebun sawit nya.
Diatu perati orang udah berubah laban tinjau media ti baru tu enggau mega sebana ti digaga Taib Mahmud.
Udah bekau nerima repot bekaul enggau pengawa nyerang Surik Anak Muntai ti dikereja bala apek bayat di Melikin, Serian, raban polis diatu mansik pelilih menua nya.
Raban polis ditemu enggau bechara ngelaban kepala kem kayu batang di endur nya, taja pan iya endang dikelala bala orang bansa asal di menua nya, nyadika kepala apek bayat ti nguluka lima iku apek bayat nyamah Surik Anak Muntai nya suba.
Tang ba ujung minggu nyin kemari bala pemesai opis polis udah ngemeranika diri mansutka penerang bekaul enggau pengawa sida ti tetemuka mayuh macham senyata api ti dilalaika orang dalam kem-kem kebun sawit di menua Melikin.
Penerang bala pemesai polis nya udah nunjukka nama kebuah bala orang di menua Sarawak udah idup dalam penakut laban kena keruga bala apek bayat ari Sibu nya, ti semina dipeda bekeregap sebelah kebun sawit enggau kem kayu batang.
Bekal senyata api ti ditemu polis nya nyengkaum lungga enggau duku, senapang, bom enggau pekekas dikena nyaga diri empu. Tang pengawa raban polis ti ngeluarka penerang ti udu nyelai baka nya semina ditimbal raban pengarang berita enggau nadai pengeransing.
Enti Taib Mahmud deka ke “berita bendar” ditusui bekaul enggau atur nebang kampung di Sarawak, nama kebuah cherita keduan nya enda ditusui enggau penuh bala pengarang berita ti dikuasa iya?
Lalu baka ni munyi cherita ti ‘manah-manah’ ti bisi dalam runding Kepala Menteri nya dikena ‘nimbal’ gaya ti ‘enda manah’, enti tindak enda diambi diambi dikena nangkap tauka nawa bala apek bayat nya enggau mega bala kepala kompeni ti ngupah sida?
Nitihka pun penatai berita ti ofisyel ke Sarawak Report ti udah nentuka dua buah kompeni ti endang udu ngeruga kampung tanah NCR di melikin dia, lalu tanah NCR di menua nya endang bisi orang bempu ti udah dikelala ngena undang-undang. Kompeni-kompeni nya United Teamtrade S/B enggau Memaju Jaya S/B.
Kedua buah kompeni nya endang bisi kaul enggau bala orang politik ti endang benama di Sarawak.
Bala pemegai syer dalam United Teamtrade S/B nya dua iku orang dagang, iya nya Kong diri menyadi ti bempu kompeni WFM Development S/B, sama enggau bakih dagang seduai iya ti benama Awang Matusin Bin Awang Drahman, ti nyadika penulung ke Menteri Perambu Pengawa, Awang Tengah Bin Awang Ali Hasssan.
Enggau ikas pengaya Awang Drahman ti bempu kebun sawit nya, kami deka nemu baka ni iya tu patut diambi bekereja nyadika penulung menteri Awang Tengah?
Tauka, sekali ke Awang Drahman nya nyadika proksi dagang ke Awang Tengah?
Sekali ke kaul politik tu ti ngupah bala apek bayat ti ngeruga sereta beduan orang bansa asal di Melikin ari ti kena dawa tauka dipechara? Sekali ke tu nyadika ketegal media berita ti dikuasa Taib mengkang enggai nusui pasal pejalai cherita tu?
Besenutuk enggau nya, sebuah agi kompeni kebun sawit ti bekereja semak menua nya, Memaju Jaya S/B, ti dipegai pemegai syer pemadu mayuh, Frederick Bayoi Manggie. Bayoi nya siku pengari rakyat, ti udah nerima lisin kebun sawit nyadika pampas ti sanggup nyurutka diri ba bepilihbesai.
Raban polis bempu tanggung pengawa nentuka sekali ke bala apek bayat nya udah dibai masuk ari Sibu, Sarawak, tauka sekali ke raban apek bayat nya udah ngeruga tauka ngemba orang bansa asal di menua nya ketegal di bukai?
Utai ti endang ditemu orang bansa asal nya pengidup sida udah dikeruga pengawa orang ti ngerampas tanah enggau kampung sida ti endur sida bepanggai pengidup tang diatu udah mai penguntung ke semina sekeda orang politik enggau orang dagang, lalu bantah sida udah disakal ngena pengasar enggau keremba.
Tu meh utai bendar dikereja, lalu Taib Mahmud irau bendar enggai ke cherita tu enda tau ditusui ngagai orang mayuh (nengah suratberita, radio tauka TV).
Dalam cherita lama United Teamtrade bisi nunjukka gaya enggau chura ti tau narit ati. Pemegai syer pemadu mayuh iya nya sebuah kompeni, WFM Development S/B, ti enggi dua iku orang dagang diri menyadi, Kong Goon Siong enggau Kong Goon Khiing.
Asil pansik kami nemu Kong diri menyadi nya bisi kaul enggau siku orang dagang, Loi Siu Hoi, ti nyadika sekretari dalam sekeda kompeni. Loi nyadi Pengarah dalam United Teamtrade, sereta kompeni nya direjista kena 12hb Empat 2007 suba.
Haribulan tu mega berebak enggau pemasuk dua iku bakih Awang Tengah, iya nya Awang Matusin enggau Awang Drahman ke dalam kompeni nya.
Setaun udah nya, kena 14hb Tiga 2008, lisin di Melikin nya dikeluarka ngagai United Teamtrade, ba sebengkah jurai dagang ti diatur (nitihka rekod dalam Opis Tanah enggau Survei) ulih penulung Awang Tengah, iya nya pemegai syer iya Awang Matusin.
Ba reti ti mudah, bayar ba penyampau RM5.4 juta nya ti dikemendarka nyadika bayar dalam kandang 5 taun, nitihka sebengkah not dalam rekod Opis Tanah enggau Survei.
Kena 2hb Sebelas 2011 udah nya, sida Kong diri menyadi nya lalu masuk dagang kunsi enggau United Teamtrade nyadi pengarah lalu kompeni sida WFM Development nyadika pemegai syer, enggau Awang Matusin seduai Awang Drahman ngetanka syer seduai ba sebagi ti ketiga.
Seminggu udah nya Opis Tanah enggau Survei udah nyelak pala tanah sementara ke tanah ti diambi kompeni nya.
Bala orang politik enggau orang dagang udah bekereja sama dalam pengawa beberapa taun dikena ngulihka tanah raban bansa asal lalu nyimpan tanah nya ke guna sida empu.
Endang udah nyadika pengawa di Sarawak ti endur orang politik seruran ngiga chara ngulihka kontrak tauka pala tanah, bekereja sama enggau raban orang dagang, ti besedia ngeluarka sebagi ari duit syer ngagai bala orang politik dalam kompeni sida. Enggau tu, ulih tauka enda Awang Tengah meri penerang ti silik pasal kaul dagang iya enggau United Teamtrade.
Baka nya mega, ulih tauka enda iya enggau YB Bayoi nerangka enggau silik sapa orang ti ngupah tauka nyimpan raban apek bayat ti beserangka bala tuai raban bansa asal ti angkat mantah pengawa magi tauka nyirap tanah sida nya?
Sarawak Report diatu deka nemu enggau silik pasal kaul politik sida Kong diri menyadi, enggau siku agi bakih politik ngagai Abdul Taib Mahmud.
Ba kes ti bukai ti bisi kaul enggau segerempung kompeni enggi sida Kong diri menyadi, bisi dua iti kandang menua tanah NCR udah disirap lalu diambi Naroden Majais, Menteri Pemansang pengawa Dagang, ngagai dua buah kompeni iya, iya nya, Hydroflow S/B enggau Indranika Jaya S/B.
Pemegai syer pemadu mayuh ke dua iti kompeni tu (sebedau ti dijual ba rega bejuta-juta ringgit), WFM Plantations S/B, mega enggi Kong diri menyadi ti beopis di Sibu.
Rekod dalam Opis Tanah enggau Survei ke taun 2007/8 terang bendar nunjukka Naroden Majais nya beempu tanggungpengawa ba penyarut ngerampas tanah tu.
Siku orang ti kala udah nyadi pengajar tu, ti rapat bendar kaul enggau Taib Mahmud tu, udah mega bejalaika sebuah syer ti besai bendar ke iya empu dalam sebuah lisin ngulihka kayu batang (nengah kompeni Peninsular Rise) lalu mega beberapa iti lisin muka kebun sawit ti udah ngeruga pengidup orang raban bansa asal.
Ke bendar iya, sebuah ari kompeni iya empu (Nirwana Muhibbah S/B) udah alah dalam pechara ba kot, udah bekau bala orang bansa asal ti bempu tanah NCR nuduh sereta nawa iya ngerampas tanah nya pengawa ti salah ba undang-undang. Tang enggau pendiau iya ti bingking sereta enggai nerima pemutus kot nya, Naroden Majais udah nganjung apil dikena iya ngelaban pemutus kot, ti lalu ngujungka raban bansa asal di pelilih menua nya balat agi tanggul.
Dalam asil pansik kami tetemuka sekeda rekod ti bisi bekaul enggau kompeni Hydroflow S/B enggau Indranika Jaya S/B nunjukka sida Kong diri menyadi bisi bekereja sama enggau Naroden Majais baka sida ti bisi kereja sama enggau Awang Tengah nengah kompeni United Teamtrade.
Surat-surat penerang kompeni nunjukka Indranika Jaya S/B udah direjista kena 26hb Sepuluh 1991, iya nya sebulan sepengudah Naroden Majais dipilih nyadi kaban Dewan Undangan. Siku orang ti benama Iskandar Bin Jahiddin nyadika pengarah pemadu lama bekereja dia, ti udah diambi bekereja kenyau ari 1997 suba.
Kami ulih ngamatka penerang pasal bini Iskandar Jahiddin nya menyadi tamping pala enggau bini Naroden Majais. Ari nya kami ulih belabaka Iskandar nya nyadika nomini ngagai Naroden, laban enti enda baka nya iya tentu enda patut ngaga kaul dagang enggau sapa-sapa ngena tanah di menua nya.
Nangkan ke nya, nitihka rekod ke bukai, dalam taun 2002 dia Kong diri menyadi mega bekereja nyadi pengarah dalam Indranika Jaya.
Ba entara taun 2003 enggau 2007 mayuh bendar lisin di pelilih menua Gedong di Sarawak udah diberika ngagai kompeni tu.
Lalu ke penudi tu tadi ba taun 2009, nama Naroden Majais udah ditukar nyadika orang ti tau endur betanya ba dagang kunsi nya nitihka rekod ba Opis Tanah enggau Survei, enggau sida Kong diri menyadi (taja pan seduai menyadi nya mengkang direjista ngena endur ti sama ba Jalan Rubber, Kuching, Sarawak, enggau kompeni pengerampas tanah ti bukai enggi Naroden Majais).
Ba renggat tu pengawa megai syer dalam kompeni nya udah berubah berebak enggau penumbuh dagang kunsi entara WFM Plantations enggi sida Kong menyadi (ti megai 70% syer) lalu Sadong Wibawa (ti megai 30% syer).
Perintah Menua Sarawak udah ngeregaska ‘dagang kunsi’ tu sereta ngela pengawa nya ‘pemansang dagang kunsi’ baka ti dilanggur Naroden Majais.
Tang, terang bendar pengarah asal kompeni Indranika enggau pemegai syer pemadu mayuh iya, Iskandar Jahiddin (iya nya biras Naroden), mengkang nyadika pemegai syer pemadu besai dalam kompeni nya ti patut ngarika pegai syer bala orang asal ti bempu tanah NCR dalam ‘pengawa dagang kunsi’ nya.
Ari 10,894 iti syer ti dikeluarka dalam Sadong Wibawa dia Iskandar Jahiddin megai 5,000 iti syer ke iya empu, lalu siku agi orang, Alwa Bin Dris, megai 5,000 iti syer, lalu laluh 894 syer nya dibagi-bagi ngagai bala orang ti bempu tanah NCR endur ngatur ‘pengawa dagang kunsi nya’ – siti syer ke siku orang bansa asal. Tu meh gaya pengawa dagang kunsi ti dilanggur Naroden Majais nya!
Dulu ari tu Sarawak Report udah ngaga kira-kira udah bekau mensia mayuh begau ke pengawa Perintah Sarawak ti dipeda bisi ngeluarka dividen ke syer dalam sadong Wibawa, tiap iku ti bempu tanah NCR semina bulih dividen RM200 ke tiap iti syer ti dipegai sida!
Penyampau bayar pulai nya enda setipak enggau pengelenyau tanah sida ti datai ari pengawa dagang kunsi ti baka nya.
Tang enti kitai ngelipat 5,000 kali, iya deka mai penguntung RM1 juta ngagai dua iku pemegai syer nya!
Lalu asil pansik kami udah ngayanka sebengkah proses ti sebaka ti dikereja ba Hydroflow, ti ditumbuhka dalam taun 1992, enggau pengarah ke terubah sida nya Japar Bin Mustapa.
Japar nya petunggal diri menyadi enggau Naroden, ti endur indai seduai iya diri menyadi tamping pala.
Enggau nya kami ulih belabaka Japar nya nyadika pengari ke Naroden.
Kong diri menyadi nyadi pengarah dalam kompeni tu dalam taun 2003 lalu Naroden udah bejalaika beberapa bengkah pengawa ba atas beberapa iti plot ti diagihka ngagai kompeni tu entara 2004 enggau 2007.
Dalam taun 2009 kompeni Hydroflow udah dibagi ngagai ‘dagang kunsi’ entara kompeni WFM Plantations enggi Kong diri menyadi (ti megai syer 70%) enggau sebuah agi kompeni ti bempu “tanah NCR” benama Punggor Wibawa Iti megai 30% syer).
Taja pan baka nya, sekali agi pemegai syer pemadu besai dalam kompeni tanah NCR tu mengkang Japar Bin Mustapa, enggau siku agi orang ke bukai, Shara Bin Enai. Dua iku seduai tu megai 5,000 syer, lalu laluh syer nya dipegai bala orang bansa asal ti bempu tanah NCR ti semina megai siti syer siku ba laluh 740 syer ti dikeluarka!
Tang baka ni penguntung ari pengawa magi-magi tanah pesaka nya?
Rekod bisi nunjukka Kong diri menyadi udah jampat-jampat nyual 70% syer seduai ba 5,562 hektar tanah NCR dalam Hydroflow (nengah sebuah kompeni sida iya nya kompeni Sawit Green Plantations Bhd ba rega RM72.5 juta ba taun nyin kemari.
Jaku ari piak TF Plantations nengah Repot Ujung Taun sida madahka pengawa jual-beli syer nya bekaul enggau rega RM18,700 ke sehektar ba tanah ti dipegai Hydroflow.
Tang dalam sebengkah not dalam rekod ba Opis Tanah enggau Survei (ti ditiriska) ngayan Naroden udah ngulihka tanah tu ari perintah menua ba rega RM500 sehektar dalam taun 2006!
Penyampau rega ti dibayar sida nya RM2.8 juta, ti mai penguntung RM70 juta … sebengkah penyampau ti endang nadai dipasukka dalam wang turu Perintah Menua Sarawak, tauka ngagai bala orang bansa asal ti bempu tanah NCR di pelilih menua Gedong, tang semina ngagai sekeda orang ti bisi kaul politik ti bisi kaul enggau pengawa ngeruga enggau ngerampas tanah, Naroden Majais.
Enggau nya, kami deka nemu, nama pengawa Menteri ‘Pemansang’ Pengawa Dagang Kunsi tu ngagai orang Sarawak, lebuh semua pengelandik iya ditujuka iya dikena nambahka pengeraja iya empu enggau bala kroni dagang iya lalu ukai ke orang bukai?
Lalu naka meh pengempang ati Kepala Menteri Abdul Taib Mahmud ngemendarka pengawa ngerampas tanah nya dikereja dalam menua iya lalu disukung seraban apek bayat dikena ngeruga enggau ngemba bala orang bansa asal?